Молитва
Пресвята́я Тро́ице, единосу́щная Держа́во, всех благи́х Вина́, что воздади́м Тебе́ за вся́, я́же возда́ла еси́ нам, гре́шным и недосто́йным, пре́жде, не́же на свет произыдо́хом, за вся́, я́же воздаёши коему́ждо нас по вся́ дни, и я́же угото́вала еси́ всем нам в ве́це гряду́щем! Подоба́ше у́бо, за толи́кия благодея́ния и щедро́ты, благодари́ти Тя́ не словесы́ то́чию, но па́че де́лы, храня́ще и исполня́юще за́поведи Твоя́: мы́ же, отра́стем на́шим и злы́м обы́чаем внемши́, в безчи́сленныя от ю́ности низверго́хомся грехи́ и беззако́ния. Сего́ ра́ди, я́ко нечи́стым и осквернённым, не то́чию пред Трисвято́е лице́ Твое́ безсту́дно яви́тися, но ни́же и́мени Твоего́ Пресвята́го изрещи́ довлея́ше нам, а́ще бы не Ты́ Са́ма благоизво́лила, во отра́ду на́шу, возвести́ти, я́ко чи́стыя и пра́ведныя лю́биши, и гре́шники каю́щияся ми́луеши и благоутро́бне прие́млеши. Призри́ у́бо, о Пребоже́ственная Тро́ице, с высоты́ Святы́я Сла́вы Твоея́ на нас, многогре́шных, и бла́гое произволе́ние на́ше, вме́сто благи́х де́л, прии́ми; и пода́ждь нам ду́ха и́стиннаго покая́ния, да возненави́девше вся́кий грех, в чистоте́ и пра́вде, до конца́ дне́й на́ших поживе́м, творя́ще пресвяту́ю во́лю Твою́ и сла́вяще чи́стыми по́мыслы и благи́ми дея́ньми сладча́йшее и великоле́пное и́мя Твое́. Ами́нь.