Молитва
О вели́цыи уго́дницы Христо́ви и чудотво́рцы, святи́телие Феодо́ре и Иоа́нне! Се мы́ недосто́йнии и гре́шнии, скорбьми́ мно́гими угнета́емии, к вам усе́рдно прибега́ем, и с упова́нием кре́пким мо́лимся: отцы́ богомилости́вии и благопослу́шливии, милости́вно услы́шите ны́не глас наш моле́бный, и потщи́теся на по́мощь на́шу, и я́ко при жи́зни ва́шей всем скорбя́щым и озлобле́нным помо́щницы и утеши́телие бы́сте, та́ко и ны́не любо́вь ва́шу к нам яви́те, благода́тным де́йством благоприя́тных моли́тв ва́ших, претворя́юще скорбь на́шу в ра́дость, печа́ль же на утеше́ние. Вся́ бо мо́жете о укрепля́ющем вас Христе́, Его́же ве́рнии служи́тели бы́сте; от Него́же прия́вше вся́ обетова́ния благи́я, низпошли́те и нам вели́кую и бога́тую ми́лость Госпо́дню, да воспоём и просла́вим ди́внаго во святы́х Свои́х Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.